Sabay New Online «ខែរងា»
ខែមករា 27, 2011 at 12:41 ល្ងាច បញ្ចេញមតិ
ថ្ងៃនេះគេហទំព័រ Sabay បានចេញផ្សាយអត្ថបទមួយពីស្នាដៃថ្មីរបស់ខ្ញុំ៖ http://news.sabay.com.kh/articles/64929
“ខែរងា”
ក្រៅពីបទចម្រៀង អ្នកនិពន្ធ សុខ ចាន់ផល ក៏មានសៀវភៅរឿងប្រលោមលោកមនោសញ្ចេតនាសម្រាប់កំដរអារម្មណ៍ប្រិយមិត្តដែរ! “ខែរងា” ឬ ”Winter Love” របស់អ្នកនិពន្ធរូបនេះនឹងចេញមកស្វាគមន៍ប្រិយមិត្តឆាប់ៗខាងមុខ។
អ្នកនិពន្ធប្រចាំផលិតកម្មរស្មីហង្សមាសរូបនេះបានប្រាប់ Sabay ថា “ខែរងា” គឺជាប្រលោមលោកនិយាយពីស្នេហារវាងបុរសនិងនារីមួយគូ ដែលបានជួបគ្នាដំបូងនៅខែរងាឆ្នាំ២០០៦ ហើយក៏ជួបគ្នាម្ដងទៀតនៅខែរងាឆ្នាំ២០០៧។ ក្រោយមកពួកគេចាប់ផ្ដើមស្រលាញ់គ្នា និងឈ្លោះគ្នា រហូតដល់ខែរងាឆ្នាំ២០០៨ទើបបានជួបគ្នាម្ដងទៀត។
ពេលសួររកពីមូលហេតុនៃការសរសេររឿងនេះ លោក សុខ ចាន់ផល តបថា “បរិយាកាសខែរងាកាលណោះផ្ដល់គំនិតរឿងនេះឱ្យ… ខ្ញុំចង់សរសេរសៀវភៅមួយឱ្យអ្នកអានមានអារម្មណ៍ដិតដាមនឹងខែរងា… ព្រោះខ្ញុំចូលចិត្តខែរងា…”។ គាត់បានឱ្យដឹងទៀតថា លោកបានរៀបចំបោះពុម្ពដោយមានការឧបត្ថម្ភពីសហគមន៍ខ្មែរនៅទីក្រុង ម៉ុងរ៉េអាល់ ប្រទេសកាណាដា ។ ជាមួយគ្នានេះលោកសរសេរជូនជាពិសេសចំពោះមនុស្សគ្រប់គ្នាដែលស្រលាញ់អនុស្សាវរីយ៍ ហើយពួកគាត់ជាពិសេសប្រជាជនខ្មែររស់នៅបរទេសនឹងនឹកស្រមៃឃើញខែរងានៅស្រុកខ្មែរ ពេលអានបទនិពន្ធមួយនេះ។
ចំពោះរយៈពេលនៃការសរសេររឿងនេះ លោកប្រាប់ថាមិនយូរទេគឺប្រហែល១ខែក្នុងបរិយាកាសខែរងាឆ្នាំ២០០៦ ប៉ុន្តែត្រូវបានកែសម្រួលច្រើនមុននឹងសម្រេចបោះពុម្ព។ ចំណែករឿងបោះពុម្ពផ្សាយគឺលោកចង់ឱ្យទាន់រដូវរងាដែរ តែខាងរោងពុម្ពយឺតបន្តិច ដូច្នេះលោកសង្ឃឹមថាវាអាចនឹងចេញលក់ក្នុងខែកុម្ភៈនេះ។ លោកថា “…នឹងមានការគាំទ្រច្រើនព្រោះជារចនាបថប្លែកមួយទៀតរបស់សៀវភៅខ្មែរ…”។
ចំពោះផ្នែកសៀវភៅរឿង “ខែរងា” គឺជាស្នាដៃទី៤របស់ លោក សុខ ចាន់ផល បន្ទាប់ពីរឿង “ចង្កៀងនិទានរឿងខ្មោច”, “កំណត់ហេតុស្នេហ៍” និង “ស្នេហាសុភាពបុរស”។ ចំពោះផ្នែកតន្ត្រីវិញ អ្នកនិពន្ធរូបនេះមានបទចម្រៀងកំពុងពេញនិយមជាច្រើនដូចជា “Callមកបងពេលគេបោះបង់អូន”, “ស្រលាញ់គឺលះបង់”, “ក្រៅពីអូនមិនយកប្រពន្ធ”, “Calltuneសុំទោស” ជាដើម។
អត្ថបទ៖ ឌុច ប៊ុណ្ណាឡម
Trackback this post | Subscribe to the comments via RSS Feed