អនុស្សាវរីយ៍

សង្សារ A B C

ចាន់ផល — Fri, 27 Jan 2012 11:11:53 +0000

មានរឿងថ្មី ដាក់ជូនប្រិយមិត្តអាន គឺទើបតែសរសេរកាលពីយប់មិញនេះឯង! ទើបតែដឹងថា បទនិពន្ធខ្លះកើតឡើងដោយសារអ្នកនិពន្ធដេកមិនលក់ lol កុំឱ្យខាតពេល សូមជូនរឿងៗៗៗៗៗៗ «សង្សារ A B C» ហេហេ

មកទល់នឹងពេលនេះខ្ញុំសរសេរទំនុកច្រៀងជាងមួយរយបទហើយ ទើបគិតថាគួរតែសរសេររឿងមួយដែលទាក់ទងនឹងអាជីពមួយនេះ រួចក៏យកបទចម្រៀងប៉ុន្មានបទមកធ្វើជាតួអង្គតែម្ដង ហេហេ ម្យ៉ាង… មនុស្សបច្ចុប្បន្នចាប់អារម្មណ៍ស្ដាប់ចម្រៀងជាងអានរឿង។ ជាការពិតណាស់ វិស័យតែងនិពន្ធសៀវភៅរឿងនៅស្រុកខ្មែរ ហាក់ដូចជាកប់បាត់ទៅក្នុងប្រវត្តិសាស្ត្រ មានអ្នកនិពន្ធរឿងថ្មីៗប៉ុន្មាននាក់ប៉ុណ្ណោះដែលគេស្គាល់ ហើយមានមនុស្សដ៏ច្រើនអត់ចាប់អារម្មណ៍ នឹងការអានប្រលោមលោកសោះ ដូចឈ្មោះរបស់ខ្ញុំអ៊ីចឹង ខ្ញុំជឿថាមានក្មេងៗជាច្រើនស្គាល់ឈ្មោះខ្ញុំថាជាអ្នកនិពន្ធទំនុកច្រៀង ប៉ុន្តែពួកគេមិនដឹងថា ខ្ញុំចេះសរសេររឿងទេ។ ហេតុនេះខ្ញុំសង្ឃឹមថា ពួកគេអាចគាំទ្រស្នាដៃសរសេររឿងរបស់ខ្ញុំដូចដែលពួកគេចូលចិត្តស្ដាប់ទំនុកច្រៀងរបស់ខ្ញុំដែរ ពោលគឺខ្ញុំចង់ឱ្យពួកគេរៀនអាន ទន្ទឹមនឹងខ្ញុំរៀនសរសេរ។

និយាយអ៊ីចឹង តើមានមិត្តណាខ្លះមិនចូលចិត្តអានសៀវភៅ? ខ្ញុំមួយ ហេហេ ខ្ញុំខ្ចិលអានផុតលេខហើយ តែពេលក្លាយជាអ្នកនិពន្ធក៏រៀនអាន ហេតុនេះខ្ញុំគិតថាខ្ញុំអាចយល់ចិត្តអ្នកមិនចូលចិត្តអានបានខ្លះ… ដូចជា ព្រោះតែអ្នកនិពន្ធសរសេរផ្លូវការពេកមែនទេ? តួអក្សរក៏មានជីវិតដែរ បើអ្នកនិពន្ធចេះរៀបរាប់ ពួកវានឹងរស់រវើក ពេលគេអានទៅគឺប្រៀបដូចកំពុងមើលកុន 3D អ៊ីចឹង ហេហេ មានហេតុផលមួយទៀត ដែលខ្ញុំមិនចូលចិត្តទិញសៀវភៅ ព្រោះខ្វះលុយហ្នឹងណា៎! បែបនេះពេលនេះមិនបាច់ទិញសៀវភៅក៏អាចអានបានដែរ ព្រោះសម័យជឿនលឿនទៅហើយ ឱ្យតែប្រើអ៊ីនធើណេត តើមែនទេ? ងាយណាស់ ពេលឃើញរូបសៀវភៅ គ្រាន់តែចុចលើវាទៅ ទំព័រសៀវភៅក៏ហោះមកឱ្យយើងអាន ខ្លាចតែយើងខ្ចិលអានតើ! នេះគេហៅថា E-Book តើមិត្តភក្តិរបស់អ្នកធ្លាប់អានសៀវភៅអនឡាញបែបនេះឬនៅ? បើនៅជួយប្រាប់ពួកគេផងណា ប្រាប់ថាពួកគេនឹងចូលចិត្ត!

ចូលឆ្នាំចិន

ចាន់ផល — Mon, 23 Jan 2012 06:44:31 +0000

មុនចូលឆ្នាំ ខ្ញុំបាត់ទូរស័ព្ទចាស់មួយ ហើយគិតថាឈប់ប្រើលេខហ្នឹងទៀតហើយ រួចដល់ថ្ងៃសែន បើកកុំព្យូទ័ររៀបចំឯកសារ ប្រុងលុបអាណាមិនបានការចោល ស្រាប់តែច្រឡំចុចលុបអស់មួយ folder ធំ ថាទៅ ចូលឆ្នាំចិនឆ្នាំនេះគ្មានអីសប្បាយសោះ នៅភ្នំពេញម្នាក់ឯង មិនបានហូបម្ហូបសែន ហើយខ្វល់ចិត្តនឹងបាត់ឯកសារទៀត! បើតាមជំនឿគឺដូចជាធ្វើអីមិនសមប្រកបសោះ តែក៏ជោគជ័យដែរ ព្រោះគ្រាប់ស្មៅដែលមិត្តភក្តិជូនមកដុះល្អណាស់ នេះនែ៖

ដល់ទស្សទាយខ្លួនឯងទៅ ឆ្នាំថ្មីនេះនឹងមានបញ្ហាពិបាកដោះស្រាយ តែក៏ទទួលបានជោគជ័យដែរ គឺដូចតែរាល់ឆ្នាំហ្នឹង! ហើយទោះជាយ៉ាងណា ជំនឿទាំងនេះក៏មិនត្រឹមត្រូវដួចទ្រឹស្ដីព្រះពុទ្ធ «ខ្លួនទីពឹងខ្លួន» ដែរ! ទុកឱ្យគ្រប់យ៉ាងដើរតាមធម្មជាតិទៅចុះ! យើងមិនអាចរើសបន្លាឱ្យអស់ពីផ្លូវបានទេ តែយើងអាចពាក់ស្បែកជើងការពារកុំឱ្យបន្លាមុតបាន។

គប្បីនឹងអ្នកដទៃគឺគប្បីនឹងខ្លួនឯង

ចាន់ផល — Mon, 16 Jan 2012 09:24:54 +0000

គិតៗក៏នឹកឃើញឃ្លានេះ ជាឃ្លារំឭកខ្លួនឯង នេះអាចជាចំណុចខ្សោយ ដែលខ្ញុំចាត់ថាជាចំណុចខ្លាំង។ បានជាគិតបែបនេះ ព្រោះពេលមានអារម្មណ៍ថាធ្វើខុសលើអ្នកណាម្នាក់ ខ្ញុំតែងតែព្រួយ នៅមិនសុខ ពិបាកចិត្តខ្លាំងណាស់។ តើមានអ្នកណាដូចខ្ញុំទេ ពោលគឺឱ្យតែជ្រុលមាត់និយាយស្អីរាងធ្ងន់ ឬក៏ធ្វើអ្វីដោយភ្លេចគិតពីចិត្តគេ ក៏តាំងយកមកដេកគិតបន្ទោសខ្លួនឯង។ តែងតែបែបនេះ ហេតុនេះ ក៏ប្រាប់ខ្លួនឯងថា ត្រូវប្រយ័ត្នប្រយែង ទាំងពាក្យសម្ដី ទាំងទង្វើ ធ្វើអ្វីកុំឱ្យប៉ះពាល់គេ ទើបមិនធ្វើបាបខ្លួនឯងទៀត។ ដល់ស្គាល់ខ្លួនឯងច្បាស់បែបនេះ ក៏ជឿជាក់ថា គ្មានផ្លូវដែលខ្ញុំអាចទៅធ្វើបាបអ្នកណាបានឡើយ នៅមានពាក្យមួយឃ្លាទៀត «ស៊ូឱ្យគេធ្វើបាបខ្ញុំ ក៏ខ្ញុំមិនធ្វើបាបគេដែរ» បែបនេះទើបអាចរស់ដោយស្ងប់ គ្មានវិប្បដិសារី ព្រោះគប្បីនឹងអ្នកដទៃគឺគប្បីនឹងខ្លួនឯង។

មើលនេះចាបៗមកទុំជុំគ្នាលើធាងល្ហុង ជិតផ្កាននោង

កាត់សក់ខ្លី :)

ចាន់ផល — Sat, 14 Jan 2012 10:12:34 +0000

និយាយទៅ ខ្ញុំកាត់សក់តាំងពីចូលឆ្នាំសកលម្ល៉េះ! ឆ្នាំថ្មីគ្មានអ្វីប្លែកទេ ការងារដដែល ប្រាក់ខែដដែល មានតែកាត់សក់ឱ្យប្លែក ម៉ែខ្ញុំចូលចិត្តឱ្យខ្ញុំកាត់សក់ខ្លីណាស់ តែមិនដឹងថា បើឃើញខ្ញុំកាត់ដូចកោរអ៊ីចឹង គាត់គិតយ៉ាងម៉េចទេ ហេហេ អ្នកខ្លះសួរខ្ញុំថា កើតអីបានកាត់សក់អ៊ីចឹង? អ្នកខ្លះថាខ្ញុំចង់លេងម៉ូត… យ៉ាងណាក៏ដោយ កាត់សក់អស់បែបនេះពិតជាស្រួលណាស់ ស្រឡះក្បាលចែស!

តាមពិតទៅ ឆ្នាំថ្មីនេះមិនមែនគ្មានអីថ្មីនោះទេ ក្រៅពីកាត់សក់ឱ្យខ្លីអស់ពីចិត្តបែបនេះ ខ្ញុំក៏បានទៅនៅផ្ទះថ្មី ម្ដុំផ្សារទូលទំពូង ហើយគិតថានឹងរៀបចំកាលវិភាគជីវិតឱ្យមានប្រយោជន៍ជាងមុន ហាត់កីឡា រៀនភាសាបន្ថែម រួចត្រូវឆ្លៀតសរសេររឿង ស្នេហាសុភាពបុរស បន្ត ប៉ុន្តែសុខភាពមិនអំណោយផលសោះ ឱ្យតែគិតច្រើនគឺឈឺក្រពះហើយ ការងារមិនជារវល់ពេកទេ តែសរសេរចម្រៀងមួយបទៗ ខួរក្បាលពិតជាហត់ខ្លាំងណាស់។ ការងារជាអ្នកនិពន្ធនេះពិតជាកម្មពៀរមែន!

មិនស្អប់

ចាន់ផល — Fri, 13 Jan 2012 11:59:19 +0000

ជួនកាលខ្ញុំគ្មានការជឿជាក់លើខ្លួនឯងសោះ… ប៉ុន្តែមានមនុស្សច្រើនណាស់ ដែលបានស្គាល់ខ្ញុំក្នុងពេលនេះ។ ពួកគេសរសើរខ្ញុំ ផ្ដល់កម្លាំងចិត្តដល់ខ្ញុំ ធ្វើឱ្យខ្ញុំជឿថា ខ្លួនឯងមិនអភ័ព្វពេកទេ មានក្ដីស្រលាញ់ពីមនុស្សដ៏ច្រើន។ ពួកគេហាក់ប្រាប់ខ្ញុំតាមដួងចិត្តថា កុំចុះចាញ់ ត្រូវតែខំប្រឹងបន្តទៀត។ មនុស្សដូចជាខ្ញុំតែងតែមានបំណងល្អនឹងមនុស្សគ្រប់គ្នា តែអ្នកខ្លះក៏ហាក់មិនជឿខ្ញុំ ប៉ុន្តែបទពិសោធន៍បានបង្រៀនខ្ញុំថា យើងបានធ្វើល្អរួចហើយ ទុកឱ្យគេជាអ្នកគិតទៅចុះ។ ទទួលបានក្ដីស្រលាញ់ ក៏មិនត្រូវចុះចាញ់នឹងក្ដីស្អប់ដែរ។ ខ្ញុំមិនអាចធ្វើអ្វីឱ្យល្អឥតខ្ចោះទេ តែខ្ញុំត្រូវធ្វើវាឱ្យអស់ពីចិត្ត។ ឆាកជីវិតគឺបែបនេះ ប្រជែងនឹងវាសនា ប្រយុទ្ធនឹងអារម្មណ៍ស្អប់ខ្ពើមរបស់មនុស្សដូចគ្នា ប្រហែលជាគ្មានទេ ទីកន្លែងដែលមានតែក្ដីស្រលាញ់។

ខ្ញុំសរសេរអារម្មណ៍ខ្លួនឯងនៅទីនេះធ្លាប់ទៅហើយ។ ទីនេះគឺជាកំណត់ហេតុរបស់ខ្ញុំ ហើយខ្ញុំចង់ឱ្យសៀវភៅមួយក្បាលនេះសម្បូរដោយអារម្មណ៍រីករាយ។ អនុស្សាវរីយ៍មិនមែនជាទីឈ្លោះប្រកែកគ្នាឡើយ ប៉ុន្តែបែរជាមានភ្ញៀវខ្លះចូលមកសរសេរឌីដង មកជាមួយនឹងអារម្មណ៍មួរម៉ៅ ធ្វើឱ្យខ្ញុំអានហើយក៏ក្ដៅក្រហាយតាម។ ខ្ញុំប្រហែលស្គាល់ឆ្អែតហើយ នូវអារម្មណ៍អាក្រក់ៗបែបនោះក្នុងអំឡុងពេលលូតលាស់។ ហេតុនេះខ្ញុំតែងបង្រៀនចិត្តខ្លួនឯងឱ្យស្លូត ឱ្យពោរពេញតែក្ដីស្រលាញ់ ចាកពីក្ដីស្អប់ដែលធ្វើបាបខ្លួនឯង។ ប៉ុន្តែអារម្មណ៍មួរម៉ៅនោះក៏ឆ្លៀតវិលមកលេងខ្ញុំម្ដងម្កាល ពេលណាបានជួបមនុស្សប្រភេទនេះ។ មានអ្នកមកសរសេរមតិមួរម៉ៅឱ្យខ្ញុំអាន ហាក់ដូចជាចង់ទាស់ជាមួយនឹង? តែខ្ញុំមិនដែលលុបមតិអ្នកណាម្នាក់ឡើយ ទុកឱ្យគេចងចាំថា បានសរសេរអ្វីខ្លះនៅទីនេះ។ ខ្ញុំពិតជាចង់ធ្វើជាមិត្តរបស់គេ ចង់ជជែកគ្នាលេងដោយរីករាយ ចង់ធ្វើឱ្យទីនេះកាន់តែដូចពិភពលោកដែលខ្ញុំស្រម៉ៃ មានតែសំណើច មានតែអារម្មណ៍ល្អៗ និងការចងចាំល្អៗ។

ទឹកតែមួយកែវនេះមានក្លិនឈ្ងុយឈ្ងប់ណាស់ ក្លិនដែលបានពីក្ដីស្រលាញ់របស់ម្ដាយធម៌ខ្ញុំ…

ឆ្លៀតឱកាសនេះ ខ្ញុំពិតជាអរគុណដល់មនុស្សដែលស្រលាញ់ខ្ញុំគ្រប់គ្នា អរគុណវត្ថមានរបស់អ្នកក្នុងជីវិតខ្ញុំ ក៏ដូចជានៅក្នុងប្លកអនុស្សាវរីយ៍មួយនេះ! ខ្ញុំចង់ប្រាប់ថា ខ្ញុំមិនស្អប់អ្នកណាឡើយ។

រាជ បូព្រឹក្ស

ចាន់ផល — Thu, 12 Jan 2012 03:40:37 +0000

ជាអាល់ប៊ុមពិសេសទី២ របស់រស្មីហង្សមាស (Th Second Mini Album of RHM) ដែលក្នុងនេះមានបទចម្រៀង៦បទ សរសេរទំនុកច្រៀងដោយខ្ញុំ សុខ ចាន់ផល ដឹកនាំសម្ដែងដោយ ខាំ ភូរិ និង កៅ សីហា ច្រៀងដោយ ឆន សុវណ្ណរាជ និង ទេព បូព្រឹក្ស ។

ទស្សនាវីដេអូផ្សព្វផ្សាយ៖

Can you hear my ♥ ?

ចាន់ផល — Tue, 27 Dec 2011 07:09:43 +0000

គិតទៅ គ្មាននណាអាចបង្ខំឱ្យយើងសរសើរអ្វីមួយឡើយ តែបើយើងពិតជាពេញចិត្ត ក៏គ្មានអ្នកណាអាចហាមមិនឱ្យយើងសរសើរបានដែរ។ ជាតិជាមនុស្សចូលចិត្តមើលរឿងភាគទូរទស្សន៍ម្នាក់ ពេលនេះខ្ញុំមិនសរសើររឿងភាគកូរ៉េមិនបានមែន។ ខ្ញុំទើបតែមើលរឿង «Can you hear my heart?» នេះ បានប៉ុន្មានភាគប៉ុណ្ណោះ ប៉ុន្តែខ្ញុំចូលចិត្តវាខ្លាំងណាស់។ គួរនិយាយថា ព្រោះតែវាចាក់ចំបេះដូងខ្ញុំ ឬក៏យ៉ាងម៉េច? អ្នកនិពន្ធនេះពិតជាពូកែដាស់អារម្មណ៍មនុស្សខ្លាំងណាស់។ ក្មេងស្រីម្នាក់កើតមកក្នុងវាសនាអភ័ព្វ ប៉ុន្តែនាងនៅតែសើចបាន ធ្វើឱ្យខ្ញុំយំទៅវិញ។ សង្វេគណាស់នៅពេលឃើញក្មេងម្នាក់ ដែលគ្មានសូម្បីតែឈ្មោះ មានតែម្ដាយម្នាក់ជាមនុស្សគ ថ្ងៃមួយម្ដាយនាងក៏ក្លាយជាប្រពន្ធមនុស្សមិនគ្រប់ទឹកម្នាក់ ក្នុងគ្រួសារដ៏ក្រីក្រ។ មនុស្សមិនគ្រប់ទឹក តែមានបេះដូងពោលពេញដោយក្ដីស្រលាញ់ ក្មេងស្រីក៏មានគ្រួសារនឹងគេ តែភ្លាមៗម្ដាយក៏ត្រូវស្លាប់ក្នុងភ្លើងឆេះរោងចក្រ។ ក្មេងស្រីនៅតែអាចរស់ដោយរីករាយបាន…

E-Book ស្នាដៃខ្ញុំ

ចាន់ផល — Sat, 24 Dec 2011 03:41:30 +0000

ចាប់ពីពេលនេះទៅ ខ្ញុំនឹងធ្វើ E-Book ស្នាដៃខ្ញុំ សម្រាប់មិត្តអ្នកអានលើអ៊ីនធើណេត។ ស្នាដៃដំបូង ដែលខ្ញុំបាន Upload គឺ រឿង កាបូបលុយ

បន្ទាប់មកគឺប្រលោមលោក រឿង ខែរងា វគ្គ ១

សង្ឃឹមថា បងប្អូនខ្មែរទូទាំងពិភពលោកសុទ្ធតែបានអានបទនិពន្ធរបស់ខ្ញុំ ហើយខ្ញុំសូមអរគុណដល់បងស្រី លឹម សន្តិភាព ដែលបានណែនាំខ្ញុំពី E-Book ហើយខ្ញុំក៏សូមណែនាំពីគេហទំព័រ សមាគម សេរីភាព http://khmerphnompenh.wordpress.com/ ដែលកំពុងធ្វើការផ្សាយពី E-Book ភាសាខ្មែរ ដោយខ្ញុំផ្ទាល់ជាអ្នកទទួលខុសត្រូវក្រុមសៀវភៅយុវវ័យ។

សមាគម សេរីភាព (Liberty Association) បង្កើតឡើងចាប់ពីឆ្នាំ 2009 ក្នុងគោលបំណង ជួយលើកកំពស់វិស័យអក្សរសាស្រ្ត និងអក្សរសិល្ប៍ នៅក្នុងប្រទេសកម្ពុជា។

ក្នុងពេលបច្ចុប្បន្ន សមាគមបង្កើត គេហទំព័រសៀវភៅជាភាសាខ្មែរ សំរាប់អ្នកអានជនជាតិខ្មែរ ដែលនៅទូទាំងពិភពលោក។

ចម្រៀងរឿងព្រាត់ស្លាប់

ចាន់ផល — Thu, 08 Dec 2011 10:40:15 +0000

ដល់ពេលនេះ ខ្ញុំបានសរសេរចម្រៀងន័យព្រាត់ស្លាប់ចំនួនបីបទហើយ ដែលច្រៀងដោយអ្នកចម្រៀងបីនាក់ និងថតជាវីដេអូដោយអ្នកដឹកនាំរឿងបីនាក់ដែរ។ ប្រាប់ខ្ញុំបានទេ តើអ្នកចូលចិត្តបទមួយណាជាងគេ? ហើយជួយឱ្យពិន្ទុអ្នកដឹកនាំរឿងទាំងបីនាក់ផង! ខ្ញុំផ្ទាល់មិនហ៊ាននិយាយអីទេ ព្រោះបាទដៃក៏សាច់ ខ្នងដៃក៏សាច់!

រនោចខ្លោចចិត្ត បទភ្លេងដោយ សុខ រក្សា ច្រៀងដោយ ព្រាប សុវត្ថិ ដឹកនាំរឿងដោយ អ៊ិន ទីតូ

ជួបដើម្បីបែក បទភ្លេងបរទេស ច្រៀងដោយ ឆន សុវណ្ណរាជ ដឹកនាំរឿងដោយ ហ៊ុយ ពុធ

ហៅសុបិន បទភ្លេងបរទេស ច្រៀងដោយ ឱក សុគន្ធកញ្ញា ដឹកនាំរឿងដោយ ប៊ុន ចាន់និមល

គូស្នេហ៍៦ឆ្នាំ

ចាន់ផល — Wed, 07 Dec 2011 07:17:56 +0000

ជាអាល់ប៊ុមពិសេសដំបូងរបស់រស្មីហង្សមាស (The First Mini Album of RHM) ដែលក្នុងនេះមានបទចម្រៀង៦បទ សរសេរទំនុកច្រៀងដោយខ្ញុំ ដឹកនាំសម្ដែងដោយ ប៊ុន ចាន់និមល ច្រៀងដោយ ព្រាប សុវត្ថិ និង ឱក សុគន្ធកញ្ញា សម្ដែងដោយតារាល្បីៗជាច្រើនរូប។

ទស្សនាវីដេអូផ្សព្វផ្សាយ៖